Þá er það komið svart á hvítu, það skiptir engu máli hvaða flokkar sitja við völd - ríkið þenst bara út. Pólitíkin snýst sífellt meira um að viðhalda sjálfri sér og grefur sig alltaf dýpra og dýpra inn í launaumslagið hjá fólki.

Athyglisvert að sjá líka að hin margrómaði sparnaður við sameiningu sveitarfélaga hefur heldur en ekki staðið fyrir sínu:
"Útgjöld sveitarfélaga á mann hafa aukist mun meira eða nánast þrefaldast (185% vöxtur) á tímabilinu á þennan mælikvarða. Útgjöldin námu 226 þúsund krónum á mann 1980 en voru 646 þúsund krónur árið 2008."
Vissulega hefur yfirfærsla verkefna til sveitarfélaga haft áhrif á þessa tölu en það útskýrir varla þreföldun á útgjöldum.

Enn frekar áhugavert að "velferðarútgjöldin" í formi heilbrigðis- og menntamála hafa vaxið úr 22,6% í 25,3% af landsframleiðslu á sama tíma og vælt er undan niðurskurði í báðum flokkum. Hvað er eiginlega að gerast? Eru þessir málaflokkar kannski svona hörmulega lélegir í að nota peningana? Er kannski kominn tími til að pólitíkusar haldi puttunum frá peningunum?

Athyglisvert að mest af þessari að því er virðist stjórnlausu útþenslu hins opinbera verður undir "hægri" stjórnum - hvað í ósköpunum myndi gerast undir langvarandi vinstri stjórn?

Rammstein í gærkvöldi - ekki beinlínis hægt að kvarta undan þeim! Show-ið var ótrúlega flott að venju.

Síðasta ár var öflugt í tónleikum en nú er stefnan að gera enn betur. Rammstein komið, KISS verða á Malmö Stadion í júní og svo er Sonisphere hátíðin í ágúst. Þar verða Anthrax, Alice Cooper, Heaven and Hell (sjálfur Ronnie James Dio), Iggy and the Stooges (Iggy Pop), Mötley Crüe, Slayer og svo Iron Maiden.

Spurning hvort maður finnur ekki svo eitthvað meira, freistandi að skella sér á Sweden Rock líka og sjá Aerosmith, Billy Idol og Guns'n'Roses.

Síðasta vor, nánar tiltekið þann 7. maí síðastliðinn, sagði ég frá tilraun Malmöborgar til að koma sér á kortið í Second Life, þrívíða tölvuheiminum sem átti að taka við af hinum raunverulega heimi á nokkrum árum.

Nú er svo komið að peningarnir í þetta verkefni eru búnir og þess vegna ætlar Malmö borg að hætta sinni þátttöku og loka Malmö hluta Second Life með einhvers konar lokahófi þann 26. febrúar. Carina Nilsson, formaður nefndarinnar sem sér um "netsamskipti" borgarinnar sagði að það væru alltaf einhverjir sem væru þarna inni og því væri ekki hægt annað en að hætta með stæl. Hver sá stæll á að vera kemur ekki fram.

Ekki kemur fram heldur hvað ósköpin kostuðu í heildina en í undirbúninginn og fram að opnun tókst að setja hvorki meira né minna en 1,1 milljón sænskra króna í verkefnið, sem kemur út sem hvorki meira né minna en rúmlega 3.716 sænskar krónur fyrir hvern þann dag sem þetta verður opið og á þá eftir að reikna inn í það allan rekstrarkostnað.

Nú er fyrrnefnd Nilsson að vinna að því að "marka stefnu" um hvernig kommúnan á að koma fram á netinu og nefnir að ýmsar stofnanir borgarinnar, svo sem borgarbókasafnið og ferðamálaráðið séu byrjuð að hasla sér völl á Facebook.

Fyrsta orustan í löngu stríði við bankann minn hérna í Svíþjóð (SEB) er loksins unnin. Eftir fimm ára nöldur í gegnum tölvupóst gaf bankinn sig loksins og nú er hægt að sækja reikningsyfirlit sem excel skjal í gegnum heimabankann. Excel skjal var nú kannski ekki formið sem ég vildi fá, XML, CSV eða jafnvel JSON hefði verið mun betra en það þýðir bara að baráttan heldur áfram! Kannski ég fari að senda tölvupóst í hverjum mánuði núna!

Hvað er hægt að segja um veðurfarið síðustu vikur hérna í Malmö? Hér er enn allt á kafi í snjó, þó ég noti vissulega orðasambandið "á kafi" svolítið frjálslega í þessu samhengi, en það er frekar skrýtið að sjá að það er talsvert meiri snjór í Malmö en bæði á Dalvík og í Reykjavík. Allt ófært í suður Svíþjóð, lestir ganga bara öðru hverju og rútur einna helst í að fara út af vegum.

Það væri ótrúlega gaman að geta sagt hryllingssögur af því hvað Skánar eru skelfilegir í að keyra í snjó en því miður er reynslan af Reykvíkingum og nágrönnum litlu betri en reynslan hér í Malmö síðustu vikur.

Annars er það ótrúlega þægilegt að hafa snjóinn þó ekki sé nema bara til að lýsa upp skammdegið, talsverð tilbreyting frá hefðbundnu vetrarveðri á Skáni, dumbungi og rigningu.