...það eru víst komin jól, gleðileg jólin!

Hugsanlega hérna á Skáni já, ég þurfti að skafa af bílnum þegar ég fór í vinnuna í morgun og það bara talsvert.

Tók mig töluvert lengri tíma en venjulega að keyra í vinnuna þar sem "Skánar" eru ekki vanir svona veðurfari og umferðin gekk hægt fyrir sig, hending ef einhver hafði bílinn yfir 30. Kannski þess vegna sem ekki hafa orðið meira en 110 óhöpp vegna hálku í dag á Skáni.

Ég þarf annars ekki að kvarta, tók einn vinnufélagann rúmlega tvo tíma að keyra heim eftir vinnuna í dag. Eins gott að hann vakni snemma á morgun!

Jahérna hér, það snjóar hérna fyrir utan akkúrat núna. Hélt að Skåne væri á bannlista fyrir slíkt veðurfar!

Þar kom að því, Google eru hættir að fara eftir eigin mottói, Do no evil. Um leið og einhver opnar munninn og lætur út úr sér vitleysu eins og "If you have something that you don't want anyone to know, maybe you shouldn't be doing it in the first place" er nánast öruggt að allt sem sá aðili veit um þig er annað hvort verið að misnota eða á að fara að gera það.

Nú er kominn tími til að finna sér einhvern annan til að leita í gegnum. Verst að Microsoft og Yahoo eru löngu búnir að fara yfir þetta strik.

Fór í bíó í gær með Gumma og Eddu, sáum hina stórfenglegu verðandi Óskarsverðlaunamynd, 2012. Myndin er gerð af Roland Emmerich sem hefur skrifað og leikstýrt hverjum stórsigrinum í handritagerð á fætur öðrum. Nægir þar að nefna Independence Day, 10,000 B.C., Godzilla og The Day After Tomorrow, sem margir telja besta handrit kvikmyndasögunnar, Gummi gat ekki sparað lýsingarorðin um þá mynd!

Myndin stóð fullkomlega undir öllum væntingum, sagan var full af óvæntum fléttum og lítið af klisjum, tölvutæknin lítið áberandi og raunsæið við smíði arkanna var einstakt, minnti mann einna helst á Stanley Kubrick og 2001!

Ég bíð spenntur eftir framhaldinu!

(Svona til öryggis, finnið ykkur orðabók, flettið upp á orðinu "kaldhæðni" og lesið bloggið svo aftur!)