Nú veit ég ekkert hverjir lesa þetta blogg aðrir en þeir sem skrifa athugasemdir hér reglulega en ég ætla að biðja fólk að lesa þessa grein. Allt of margir halda að "ráðgjafar" bankanna séu eitthvað meira en sölumenn sem eru að reyna að fá fólk til að kaupa þjónustu hjá bankanum.

Margir hafa farið flatt á því að hlusta á ráð þessara ráðgjafa án þess að efast um eitt eða neitt. Þess vegna voru svona margir með þessi "myntkörfulán", þeim var "ráðlagt" það. Persónulega finnst mér að fólk sem tók þessi lán eiga stóran hluta af skellinum skilinn fyrir það eitt að ekki kynna sér grunninn í lánunum og að skoða ekki áhættuna sem fylgir gengistryggðum lánum þegar saga íslensku krónunnar er ekki beisnari en hún er en þessir svokallaðir "ráðgjafar" eiga auðvitað stóran hluta af sökinni.

Ég held að það sé kominn tími til að lögvernda starfsheitið "ráðgjafi" eða jafnvel banna það algjörlega. Það er einungis í undantekningartilvikum sem "ráðgjafi" er ekki sölumaður eða í besta falli starfsmaður til leigu. Að minnsta kosti gefa "ráðgjafar" ekki önnur ráð en að kaupa af þeim sjálfum.

Forlagatrú er fjarri mér en samt les ég alltaf stjörnuspána mína á mbl.is því oft detta inn gullkorn þar. Dagurinn í dag held ég að hafi þó toppað allt, ég verð samt að viðurkenna að það þarf talsverðar hreðjar til að birta svona stjörnuspá á Íslandi í dag:

"Naut: Þér hefur tekist að koma fjármálunum í rétt horf og hefur því efni á að verðlauna sjálfan þig. Nærðu huga, líkama og sál með næringarríkum mat."

Úr handbókinni með PostgreSQL 8.1:

The first century starts at 0001-01-01 00:00:00 AD, although they did not know it at the time. This definition applies to all Gregorian calendar countries. There is no century number 0, you go from -1 to 1. If you disagree with this, please write your complaint to: Pope, Cathedral Saint-Peter of Roma, Vatican.

Ég hlusta ekki á útvarp, bara alls ekki neitt. Þó er ein undantekning á þeirri reglu. Óhljóðin í vekjaraklukkunni minni eru þvílík að þau myndu fæla dauðan hest en þar sem um er að ræða útvarpsvekjara hef ég val um að láta vekja mig með útvarpinu. Ég sem sagt vakna við útvarpið og hlusta á það svo lengi sem það tekur mig að velta mér á rétta hlið og slá á snooze takkann.

Gallinn hefur verið að útvarpstöðvar hafa þann ákaflega leiðinlega ávana að setja tvo til þrjá gervihressa einstaklinga á morgunvaktirnar, einhverja sem einhverra hluta vegna þurfa að vera einhvers konar ígildi Hemma Gunn á amfetamíni.

Þess vegna varð ég mjög ánægður þegar Gummi sagði mér nýlega af útvarpsstöð sem hann hafði rekist á, stöð sem spilar lítið annað en rokk allan sólarhringinn. Eftir smá leit tókst mér að finna stöðina innan um allan þann aragrúa stöðva sem er hérna á svæðinu og hugsaði mér gott til glóðarinnar.

Ekki var uppskeran samt sú sem ég vonaðist eftir, á hverjum morgni hef ég haldið áfram að vakna upp við tvo eiturhressa útvarpsmenn sem blaðra upp í hvorn annan um nákvæmlega ekki neitt en þeim finnst það allt voðalega fyndið.

Í morgun varð loksins breyting á, ég vaknaði við tónlist, gamalt og gott rokklag en áhrifin urðu ekki alveg þau sem ég bjóst við. Ég hafði einhvern veginn gert mér vonir um að vakna talsvert hressari við slíkt en við gervihressleika útvarpsmannanna en niðurstaðan var alveg þveröfug, mig langaði bara ekkert fram úr rúminu. Flytjandinn þurfti auðvitað að vera Danirnir D.A.D., áður þekktir sem Disneyland After Dark og lagið "Sleeping my day away!"

Ég og Gummi skruppum í bíó í gær þar sem við sáum hina mjög svo áhugaverðu "District 9". Ekki á hverjum degi sem maður sér suður afríska mynd í bíó og að það sé þar að auki mynd sem hægt er að flokka sem vísindaskáldsögu gerist eðlilega enn sjaldnar.

Ég ætla ekkert að fara út í söguþráðinn en mæli eindregið með að fólk kíki á hana. Þó ekki sé nema til að sjá bíómynd sem ekki kemur frá Hollywood!